Ami a nase i lanta na Boneiru, ku e tempu ei tabata forma parti di Antia Hulandes huntu ku 5 otro isla ku ta keda den área karibense, ±900 km leu di Hulanda na Oropa. Nos nashon tabata formá pa Kòrsou, Aruba i Boneiru pegá ku kosta di Venezuela i pa St. Maarten, Statia i Saba ku ta den e grupo di e islanan mas den region di nortost di Karibe.
Na kas nos tabata papia papiamentu i pa bishitá skol pa bo desaroyá komo alumno den enseñansa, tabata benta nos den e laman di idioma hulandes. Siñamentu na skol tabata bai via e idioma hulandes ku gobièrnu i e kadernan profeshonal i polítiko tabata dominá. Komo mucha krioyo bo por a tende hulandes algun ora pa siman via programa radial. Ami tabata un di e muchanan bendishoná ku tabatin bon komprenshon i dominio di e hulandes na skol. Via biblioteka na skol i na pastorí mi tabatin akseso na literatura hulandes ku tabata fasilitá mi komprenshon i dominio di hulandes mas tantu. Desaroyo di mi idioma materno mes tabata dependé di loke tabata bini dilanti via iglesia, stashon di radio, korant i despues di entrada di televishon via transmishon di sierto programa. Un impakto positivo den mi desaroyo di idioma materno tabata un beibel na papiamentu kompleto ku tèstamènt bieu i nobo ku ni a topa den kashi na kas. Mi a lesa e beibel kompletamente manera tabata trata di un buki di aventura interesante. Ku e basenan akí mi a pasa fásilmente dor di mi karera di enseñansa avansá pa kontinuá ku formashon profeshonal pa maestro di skol na Hulanda. Despues di a finalisá mi estudio pa maestro mi a regresá Boneiru i bai kontinuá ku e mesun maltrato di eduká mucha na skol básiko via e idioma hulandes pero ku asistensia di papiamentu pa por a yuda splika e materia. Tur e añanan ami tabata sinti e presensia di un hamber pa profundisá den uso i edukashon di mi idioma materno i di material na papiamentu den enseñansa. Despues di 6 aña mi a regresá Hulanda pa bai sigui studia pa dosente di idioma ingles i geografia. Despues di e estudio akí mi a traha 10 aña den enseñansa i komo empresario chikí na Hulanda. Un periodo den kua mi a desaroyá mas konosementu lingwístiko di mi idioma materno i literatura na papiamentu. Ku e fundeshi desaroyá di nos idioma materno, mi ta yora na silensio ora ku mi tende mayoria di nos gobernantenan abusá di nos dushi idioma pasobra nan tin konosementu di idioma estranhero manera hulandes i ingles.
Mi formashon komo dosente di geografia a habri mi wowo pa e realidat di e mal gerente ku nos ser humano ta pa nos planeta. Desaroyo ekonómiko pa hopi dékada tabata idéntiko na destrukshon di medio ambiente pa hisa produkshon di pais i pa risibí mas entrada finansiero. Pero D.G. tin hende a komprendé ku esaki ta pone nos riba ruta pa destrukshon di nos planeta i di nos mes. Awendia Boneiru ta parti di BES, un munisipio ekstraordinario di Hulanda. E islanan ku pa hopi siglo tabata manera e yunan di patu mahoso den reino hulandes a bira e prendanan ku biodiversidatnan úniko den reino hulandes.
Mi ta kontentu di por forma parti di un grupo ku ta traha riba kreashon di material na mi idioma materno pa eduká nos futuro generashon di siudadano tokante nos medio ambiente presioso ku mester di konservashon pa e por ta duradero pa nos siguiente generashonnan. ~Hubert Vis