Yang miskitu kum sna, Muskitia, Gracias a Dios, Honduras ra ai baikan, smamalkra kum sna, kûl nanira mani ailal ra wark tabrisa sa, tuktan nani aikuki, wahma an tiara nani aikuki, bara almuk nani aikuki sin. Bara kaikisna taim nani lui ba wal diara nani manis sins taki aula sa wan tasbya bȋlara.
Yang nani tuktan kari taim diara nani painkira uya manis kan, inska nani, kuswa nani, piawira nani, kakamuk nani, laulu pawi pliska nani sin manis pali kan Brus Lagunka un nanira. Naiwa yua isnka nani an daiwan, dus nani an laulu nani ba sin mahka tiwi auia, waikna nani bui ai ritska nani ba pain main kaikras ba mita.
Kûl nani wina sin pât kumkum aula, tuktan nani bȋla baikra, natka, bara patranka nani ba sin kulkras ba mita. Tuktan ba mahka ai dukia nani, ai ritska nani, ai daukanka, ai patranka nani ba kulkras takuia, kan kûl watlara baha nani ba rispikka yaras ba mita, ai smamalkriba nani bui dia wi yaba baha baman pain kulkuia, bara ai tawanka bȋlara natka nani pain manis bara ba mahka lulki swisa.
Baha ba aula kûl nani ba bȋla walra an natka nani sut ba wal praki smalkras ba mita, tuktan ba baha mita kumba pain kumba saura kulkuia. Baha mita nitka târa bara sa indian nani an karibian nisanka nani tilara kûl nani ba bȋla walra an natka nani sut ba wal praki smalkaia, baha ba lâ kum kaia sa, krunti nani ba lâ kum paskan kaia sa baha dukiara.
Yang nusna indian nani an karibian tanira iwi uplika nani ba patitara taimka ra ai ritska nani ba main kaiki yus muni kan, baku kli daukbia kaka, ritska nani ba kli bubia, pain takbia, inska nani kli manis takbia, piawira nani kli manis kabia, kakamuk nani kli manis kabia, dus nani kli manis paubia, bara diaia payaska uksigin ba kli manis taki kabia an diara sut painkira kabia, tain nani ûba sins takiba sin wapni takbia.
Baha mita kûl nanira smalkan kaia sa, taim nani sins takiba dia muni takisa, baha mita naha wauhkataya lupia na kûl nanira smalkan kaia sa, taim nani sins takiba dukiara, laulu pawi pliska nani tiwiba dukira, lisamra nani dingkiba dukiara, daiwan nani tiwiba an yawan kumi bani dia daukaia ba.
Lic. Scott Wood Ronas Comité de Educación Intercultural Bilingüe de la Moskitia Hondureña (CEBIMH) Miskitu, Honduras C. A
Seleccione Imagen para visitar nuestra Biblioteca Digital gratis!
