Misima gamagal hi gewi Pana Misima hi babaunan ge ali gewi iola 14 000 ge pwatana al. Hi neem Misima, Panaeati, Kimuta, ge al Kalbados Tavalina ina elal. Samalai Muluwa Distilik, Milne Bay Polobins, Papua New Guinea.
Labi tomaha ona elal ya abulilek anala i tabwa yawalila. Ana atena te bugul bolo gegewel yawaliliya i gan totola anala igan ge bosowaina wala atena ana sapu o ebo mwananal ta pempewan avalau elal (olola kilau gamagal, bwasumu hawawala, moti, bwasumu bolo hi nawanawa bilibili pwatanaa ge enuna al.) Labi Misima elana anala ta patuwalali ta liwan bugul bolo ali nuwatu i bwata Mumuga nuwatuina elana, anala ana leleli ge ana vavasili hi panpankitiyan wawayau kekeisisil elal abavavasili ona elal. He anan maisena o hi patuwalali al Tapwalolo ali migogo ona elal.
Anala maisena maisena totona wana mumuga i gan ge sauga hi gewi nige bosowaila ta teli walel etega elana. Tubulau wali eyoyowa ana pagan, wala limi ali taltal ana awa, hahagali paganina, tubulau wali galogaloi ge bwabwatana hot heiya te wala minamina ana pagan ge wala panua ana matamatahikan. Ebo gamagal tega ni liwaliwan, toto i lalaegan bosowaina yate toto i baba wana panuwa ni atena, o ebo limi ana taltal nihi kite nasi nihi atena taltal ololana o panua toto o te hi giginol, o ebo enuna tubuliyau wali isisela elana nihi galogaloiek ge nihi sagasaga. Ginoginol ololal ya sauga hi gewi hi lilitoyawa alona Anala ge ali atena i tutunahot.
Toto ya kaiwena inoke bolo yawalila i gan ala ginoginol hi pagetogaagila hot ge totola anala i gan yaka bosowaina hot ta patuwalali, ta matahikan, ta awatauwan, ta nunuwanan ge ta atena te age ana waisi i bwata hot kilau elala kaiwela ia YAWALILA. Jerry GANDO